نعت
کامران غنی صبا
لب پہ ذکرِ حبیبِ خدا چاہیے
کچھ نہیں ، کچھ نہیں ، ما سوا چاہیے
دید کو ان کی چشمِ رسا چاہیے
زہد و تقوے سے کچھ ماورا چاہیے
سجدئہ شوق کو اور کیا چاہیے
اپنے محبوب کا نقشِ پا چاہیے
ہم کو نعتِ نبی کا سلیقہ کہاں؟
بس شفاعت کا اک واسطہ چاہیے
ہجر میں دل پریشان ہے یا خدا
خواب میں روضئہ مصطفےٰ چاہیے
زاہدوں کو مبارک ہوں حور و ملک
ہم کو دیدِ شہہ انبیا چاہیے
جام کبر و ریا توڑ ہی ڈالیے
گر مئے عشق و مہر و وفا چاہیے
کاش ایسا ہو میدان محشر میں وہ
پوچھ لیں ائے صبا تجھ کو کیا چاہیے
کوئی تبصرے نہیں:
ایک تبصرہ شائع کریں